“40000 орон сууц” хөтөлбөрийн хүрээнд Монголбанк ерөнхийлөгч асан О.Чулуунбат 2006 оны гуравдугаар сарын 9-нд Жорж Чайлмэрс гэх АНУ-ын иргэний “Стоунлей интернэшнл” компанитай 200 сая долларын аккредитив нээх хууль бус гэрээ байгуулжээ. Малайзын “Лабуан офшор” бүсэд хамаарах энэ компани нь манай улсын Төвбанктай байгуулсан гэрээндээ 200 сая долларын аккредитивийг ашиглан олон улсын санхүүгийн зах зээлээс нэг тэрбум доллар татаж, уг эх үүсвэрээ ашиглан орон сууцны дээрх хөтөлбөрийн барилгын 30 мянгыг нь барихад зориулахаар тусгажээ.

 

Харин Монголбанк гэрээндээ “Гэрээгээр хүлээсэн үүргийн дагуу 56.3 сая доллартай тэнцэх аккредитивийг буцааж авч болохгүй, шилжих хэлбэрээр Швейцарийн “Росбанк”-инд нээсэн аж. Улмаар 2007 оны арваннэгдүгээр сард 39.4 сая доллартай тэнцэх аккредитив нь хаагдаж, үлдсэн 21.4 сая долларын эхний хэсэг болох гурван саяынх нь төлөгдөх хугацаа болжээ. Харин энэ үед Швейцарийн “Росбанк” аккредитиваа Бельгийн ING банкинд шилжүүлснээр тус банкинд  манайх  3028083 доллар төлсөн байх юм.

Гэрээнд “Санхүүгийн төлбөрийн хэрэгслийг төлбөр төлөхөд ашиглахгүй бөгөөд төлбөрийн хэрэгслийг төлбөр хүлээн авагч банк тогтоосон хугацаанд ямар нэгэн хураамжгүйгээр буцаан олгоно” гэсэн заалт байх юм.

Түүнээс гадна уг гэрээнд “Монголбанк нь гаргасан баталгаа аккредитиваас ямар нэгэн төлбөр төлөх болон бусад хариуцлага хүлээхгүй” гэж заажээ. Гэтэл эндээс уг гэрээг зөрчсөн явдал харагдаж байна.

Улмаар 2007 оны арваннэгдүгээр сарын 28-нд үлдсэн 18 сая долларын аккредитивын хугацаа дууссан ч О.Чулуунбат ерөнхийлөгчтэй гэрээ байгуулсан “Стоунлей интернэшнл” компанийнхан нэг ч төгрөг төлөөгүй ажээ. Тиймээс Бельги, Швейцарийн банкныхан  аккредитив гаргасан манай Төвбанкнаас 20 сая доллар нэхэмжилж буй гэнэ. Энэ асуудал нь Швейцарийн шүүхэд хэрэг бүртгэлтийн шатанд байгаа талаар эх сурвалж нотолж буй юм. Харин манай Монголбанкнаас энэ хэрэгт АНУ-ын “Милбанк” хэмээх хуулийн компанийн өмгөөлөгчдийг хөлсөлсөн бөгөөд тус компанийн төлөөлөгчид өнгөрсөн намар Монголбанкинд ирж өмгөөллийн үйл ажиллагаа явуулахад шаардлагатай баримтаа цуглуулж, бусад холбогдох байгууллагын хүмүүстэй уулзаад явжээ. Монголбанкинд холбогдох хэргийн шүүх хурал ирэх хавар болох сурагтай. Эх сурвалжаас авсан мэдээллээр Монголбанкны ерөнхийлөгч асан О.Чулуунбат Жорж Чайлмэрст залилуулан 200 сая долларын аккредитив нээсэн хэмээж буй юм байна.

Энэ хэрэгт гол зохион байгуулагчаар оролцсон Жорж Чайлмэрс энэ хугацаанд АНУ-ын М&P компанитай аккредитивийн гэрээ байгуулж нээсэн аж. Тэрбээр “Монголбанк аккредитивийг дэлхийн зах зээлд үнэд хүргэх үүднээс л М&P компанитай гэрээ байгуулсан. Монголбанк 200 сая доллартай тэнцэх хэмжээний аккредитив гаргасан тохиолдолд хөрөнгө оруулагчдаас мөнгө босгох боломжтой байсан.  Тус банк энэ аккредитиваа гаргаагүй тул хөрөнгө оруулагч нар үйлдлээ зогсоосон” гэж тайлбарлаж байгаа юм.